veg sandwich recipe l tasty sandwich

sandwich recipe in hindi

Aaj mann kar raha tha sandwich recipe khane ka, toh socha kyun na ghar mein hi woh street style sandwich banaye jaaye jo khakar maza aa jaata hai, aur saath mein woh cream chutney bhi banayi jaaye jo isse bahut hi accha taste deti hai. Sabse pehle sandwich ke liye green chutney banayenge.

Sabse pahle recipe ke liye Pichhle Saman sabse Jyada jaruri hai

(Hari Chutney) 

1. Hara dhaniya - 1 cup

2. Pudina patte - 20-25

3. Hari mirch - 2

4. Adrak - 1-2 inch

5. Lahsun - 5-6 kaliyan

6. Namak - 1/4 tsp

7. Kaala namak - 1/4 tsp

8. Laal mirch powder - 1/4 tsp

9. Jeera - 1/4 tsp

10. Garam masala - 1/4 tsp

11. Hing - 2 pinch

12. Dahi - 2 tbsp

13. Neembu ka ras - 2 tbsp

14. Thanda paani - zarurat ke mutabiq

(Aalu Masala) 

1. Aalu (boiled) - 4 medium

2. Laal mirch powder - 1/2 tsp

3. Namak - 1/2 tsp

4. Chaat masala - 1/2 tsp

5. Hari mirch - 1 (chopped)

6. Pyaz - 1 (chopped)

7. Hara dhaniya - Thoda sa

(Sandwich Assembly) 

1. Bread slices (white/brown) - zarurat ke mutabiq

2. Butter - zarurat ke mutabiq

3. Green chutney - tayar ki hui

4. Tomato sauce - zarurat ke mutabiq

5. Oregano - thoda sa

6. Chilli flakes - thoda sa

7. Tamatar, kheera, pyaz rings - patle slices

8. Kaala namak, chaat masala - sprinkle karne ke liye

9. Grated cheese - zarurat ke mutabiq

(Toasting) 

1. Butter - toast karne ke liye

2. Pan ya tawa - sandwich sekhne ke liye

sandwich recipe banane ka acche se tarika

Toh yahaan par ek cup hare dhaniye ko achhe se saaf karke dhokar mixer ke jar mein daala hai. Ismein 20 se 25 pudine ke patte daale hain, pudina zarur daale, isse bahut accha flavor aayega. Do hari mirch roughly cut karke daalein, ek se do inch adrak daalein, paanch-chhe lahsun ki kaliyan daal dein. 1/4 teaspoon normal namak daalein, 1/4 teaspoon kaala namak bhi zarur daalein, yeh chutney ko bahut accha taste deta hai. 1/4 teaspoon laal mirch powder daala hai, 1/4 teaspoon jeera daala hai, aur 1/4 teaspoon garam masala daala hai. Do pinch hing daalein. Chutney mein hing daalna bilkul na bhoolein. Chutney ka color light green aaye aur chutney tasty bane, toh iske liye do chamach dahi daalein aur do chamach neembu ka ras daala hai, jisse chutney mein accha khattapan aayega. Thoda sa thanda paani (fridge ka) daalein, normal paani ki jagah thanda paani daalne se chutney ka color dark nahi hoga. Ab isse grind karke tayar karein. Yeh dekhiye, bahut hi mazedar si sandwich wali tasty green chutney tayar hai.

Chutney banane ke baad ab sandwich ki tayyari karte hain. Char medium size ke aalu ko ubalkar chheelkar mash karke liya hai. Ismein kuch masale daalne hain. Aadha chamach laal mirch powder, aadha chamach namak, aadha chamach chaat masala, ek hari mirch finely chopped, ek medium size ka pyaz finely chopped, aur thoda sa hara dhaniya bhi daala hai. Sab masale ko achhi tarah se mix kar dein. Chaat masala zarur daalein, iska taste bahut accha aata hai. 

Ab sandwich recipe banane ke liye bread lein. Aap white ya brown jo bhi bread pasand karein use kar sakte hain. Sabse pehle bread par butter lagana hai. Kuch log direct chutney ya sauce lagate hain, lekin pehle butter nahi lagate, isse bread soggy ho jaati hai. Toh sabse pehle butter lagayein, phir green chutney spread kar dein. Jo aalu ka masala tayar kiya tha, usse poore bread par evenly spread karein.

Doosri bread lein aur uspe tomato sauce achhi tarah se spread karein. Upar thoda oregano aur chilli flakes daalein. Ab jo bread pe tomato sauce lagaya hai, usse masale wali bread ke upar sause wali side se rakhein, aur halka se press kar dein. Is bread ke upar bhi butter laga dein. Phir green chutney phir se thoda laga dein.

Ab is bread ke upar tomato slices, kheera ke slices aur onion rings lagayein. Sabhi cheezein thinly sliced honi chahiye. Thoda kaala namak aur chaat masala daal dein. Upar chilli flakes aur oregano daalein, yeh sandwich ka taste aur bhi accha banata hai. Ab upar cheese grate karein. Cheese ke upar bhi thoda chilli flakes aur oregano sprinkle karein. Ek aur bread lein, uspe tomato sauce lagayein aur sause wali side se cheese ke upar rakhein. Sandwich ko halka press karein.

Ab sandwich recipe ko tawa ya pan mein toast karenge. Pan mein thoda butter daalein aur sandwich ko carefully rakhein. Ek plate se cover karein, plate pan se chhoti ho aur sirf sandwich ke upar aaye. Uske upar thoda weight rakhein. Low flame par 1-1.5 minute tak toast hone dein. Phir plate hataayein, doosri side se bhi butter lagayein. Sandwich ko flip karke dono side se crispy hone tak sekhein. 

Ab sandwich ko nikaal lein, ek sharp knife se cut karein, aur serve karein. 

Yeh dekhiye, ekdum crispy aur tasty three-layer street style sandwich recipe tayar hai. Ismein aalu ka masala, fresh vegetables, aur cheesy flavor hai.

Hello doston mera naam hai Altaf Hussain Hamari recipe acchi Lagti Ho To Hamen comment aur aapke doston mein share kijiye